EL CARETIN DE LA BOLE E ALTRE STORIE

El caretin a pedali de la bole: I ne dasea diese schei per quel dela bole e dopo ghe disea: “Diese schei de bole e dopo el me daga anca el pesseto (aggiunta omaggio. Ndr)”.
Un tochetin de più. “Va ben” e el me le dava e mi era contento come 'na pasqua.

Quel de la bole el gavea un treciclo con el portapachi davanti.

La bole (il castagnaccio)

D: Si ricorda che macchina aveva el Toni Balan.

Prima el g'avea el careto e dopo el g'avea na machina ….
D: Forse una Giardinetta?

Eh medigo sì. El vendea le stoffe, a casa. Le so done le stasea da Isoli, su de sora, e anca in botega.

Marisa: Mi ricordo che quando i ha fato la casa sul canton tuti i disea “Varda ti che casa che l’ha tirà su Balan. Quel sì che l'è un sior!”

Attilio: Mi el volea farme fiol de anima.

Marisa: El gà lassa tuto ai preti.

Mi le case me le son fate da par mi, col me sudor.

So moier l’era la Rita, la Maria l’era so sorela.

I ricordi spaziano allargandosi ad altre piccole attività commerciali di Quinto. Le due signore sono di un'altra generazione e commentano gli anni '50 - '60.

Lorena: Quela che vendea i tabachi, la Rosi, me la ricordo ancora.

Marisa: La Maria Latàra a Quinto, me la ricordo ben. A la fermata del tram la g'avea el bar e la vendea anca el late.  ‘Ndavimo a comprarse dei siroppi che i era de un verde, ma verde ... ! La vendea el late ma la g'avea 'stì paciughi, le ruele de liquirissia, le spumiglie, schifose, con de quei colori ... ma a noialtri le ne piaseva, i era novità, erimo abituè a mangiar mandrigoli e a provarghe sodisfassio! ...  e dopo gh'era le boccettine piccole col ciuccio. Te ciucciavi 'sto sciroppo con un gusto da chimico che se no semo morti alora campemo sent’anni!
Quando gh'è stà la television andavimo a vederla al bar, e in estate se 'ndava dedrio in corte, sotto i gelsi, a vardar Carosello ...  Calimero il pulcino Nero che diceva sempre "Ava come Lava" e Calindri con il Cinar. Mi ricordo anche l'ispettore Rock, "Anch'io ho commesso un errore. Non ho mai usato la Brillantina Linetti!"
Mi pare che al giovedì ci fosse Lascia o Raddoppia col Mike Bongiorno ...
Bisognava portarsi la sedia perchè al bar  non ce n'erano per tutti.