LA GUERRA, I FASSISTI E I TEDESCHI DE LA TOD

GIANNINA: in tempo de guera emo recuperà la giassara dai mericani a Villa Grigio (Villa Vendri) quan che è 'ndà via i tedeschi è restà lì tanta roba. I se l’ha tolta in tanti che no è restà gnente. Mi g’avea tredese ani mi ho visto che i caricava su tuto … par scapar. …

Naseimo anca al cinema dai tedeschi. Come l'era el cinema? So che ciapaa paura; gh’era el treno che vegnea avanti ...

A villa Grigio gh'era quei de la Tod, la propaganda.

Te ricordito el tedesco che l’è morto parchè l’à magnà massa fighi verdi? … g’aveimo paura che i desse la colpa ai paesani…

Anca le ville de Quinto i l’à distrute tute, villa Bertani e Villa Rossi.

MARIO: Me fradel el savea el tedesco e col careto andavimo a tor el legname a Villa Rossi, che i ghe disea Delo. I à taià via i pigni, i le portaa su e i le querzea. Gh’era el deposito de tuto: ciodi, legname, rame, feri …

BRUNO: Ponte Barbareti te ricordito? (In Via San Felice, sul progno) La Casa Alta, ghe diseimo; gh’era altro che quela! ... e gh’era  siè canoni con i refletori. 
Quan che l'è a San Felice, dove gh'è el Balestra la taia in zo verso el Barana, 'ndove gh’era el Consorzio.

MARISA. So che gh’era 'na contraerea anca su le Toresele.

MARIO  Eh, sì.

DINA: Me ricordo che e vegnù zo un aereo e semo ‘ndè a vedarli. Gh’era una che i l’avea sepelida ma gh’era ancora  i piè fora, in cinque i è morti.

Con Pipo ghe n’è restà morti trì. Gh’era la Rigo, so mama de la Danila e la Maria; so fradel l’à verto la porta par andar al gabineto e gh’era na luceta….
Pipo l’à visto e l’à bombardà. El Nello Braga I è ‘ndà a ciamar el dotor e el Gelmini l’è ndà a ciamar  el prete. Gelmino Mariandi e …. I'à pestà su un spezzon …

Al Municipio ghera i fassisti, le SS. Quando i è andè via (i paesani) i à portà via la roba, macchine da scrivere, materassi …  e el prete (Don Accordini l’era apena vegnù) l’à dito: “Portè indrio la roba, feme un piaser o i ghe ne copa diese ... sucede un disastro”.

L’era fora de lu.

Gh'era uno a Quinto,  fassista, che quan è vegnù i mericani l’ha dito “dai che ghe nemo incontro” .
 “Musa da can”, disea me papà … te par, ma dai!

DINA: 'Na matina semo 'ndè zo a le basse. Semo partì bonora a le sinque.Gh’era ‘n silensio … !

Me sio el disea: ”Se ste’ siti sentemo i canoni in Sicilia”  e semo ‘ndè a le Basse a vedar se i ne vende el formento, la polenta …

I n’à fato el minestron. “Poarini, ne fè de pecà!”, i n'à dito. No i savea più cossa darte.

“Tolì quel che volì”  i disea. ... E tuto al presso de calmier.  

Ghe n’era ancora de bona gente!

Mi son vegnù su con trenta chili de polenta, con un sacco a caval de la bicicleta.
Emo fato el Buso del gato e dopo via de corsa su par le prognele!

Semo rivè a la sera a le diese, da la matina a le sinque che erimo partii, ma g’aveimo paura e doveimo star atenti.

Scondeimo tuto nei sacchi soto i materassi.

‘Ndaseimo anca a catar su i canoti e dopo sbateimo la tera, par brusarli e far fogo.

Gh’era Don Butturini che alla messa alle diese vegnea i fassisti e  vegnea su el squadron e come i vegnea i cantava la canson del Duce.

“Proteggi il Duce chi ti prega o Signor son gli innocenti sono i bimbi a Gesù tanto diletti non disprezzar Signor tanta preghiera, salva il Duce, Signor …”

Don Butturini, finìa la messa, el cominsiava na canson tacà l’altra, e via co le canzoni de cesa: Noi vogliam Dio Vergin Maria … e avanti a cantar ... in modo che quei altri (i fascisti) no i cantesse mia le sue.

I fassisti i cantava anca: “Tremate o signorine quando passa il legionario che vi parlerà d’amore con un bacio del suo cuore, Tutte belle sorridete le finestre dischiudete quando passa la gioventù  …”

Raccontato da Mario Zamboni, (1930 Vendri) Giannina Corsi (1938 Stelle) e Dina Macchiella (1930 Quinto)