INTERVISTA A SANTE SLEMER classe 1929

Marzana fine anni Cinquanta -
Negli ingrandimenti sono visibili le rotaie del tram mentre sono già installati i binari elettrici aerei per la nuova filovia.
Cio ci permette di datare la foto, con una certa sicurezza, all'anno 1959
Foto Archivio Arturo Slemer

Giugno 2010 - Racconta Sante:

Metea zo la cartela de scola, magnaa, e dele olte nasea a laorar par maiar a la sera la polenta.

Eh, in tempo de guera l’era strinà …..
 

Finìa la quinta elementare son 'ndà da Camera in Borgo Venessia. Son sta un ano e mezo a giustar le gome. Ghera el stabilimento Rossi allora che quan l’era mesogiorno vegnea zo le butele, le done co le biciclete, le vegnea co le gome sbuse e ala sera le vegnea a tòrsele, pronte.

So sta un ano e mezo medigo, (quindi ha cominciato a lavorare a dodici anni e mezzo. Ndr) dopo i sindacati i gà fato la multa parchè no gavea mia quatordesani e alora so sta nei campi fino a quatordesani e son 'ndà all’Autovalpantena, quel de le coriere.

I era in Borgo Venessia che adesso dovaria esserghe un supermercato. Fasea el mecanico nell’oficina. Dopo ò cominsià a laorar par conto mio.

Parchè el sabo e la festa erimo sempre in giro coi giovani de l’oficina. Se fasea i biglietari parchè ghe mancaa gente.

I nasea a Bosco e ghera oto, diese pulman ala matina, i ‘ndasea anca sul lago. Gavea quindise, sedese ….. diciassette ani.

Ghera un disastro de pulman e noialtri giovani dell’oficina i ne mandaa a far i biglieti. Tante olte no te saei gnanca i paesi ‘ndo te passai; i te dasea la borsa e el blocheto dei biglieti, la pinsa … andò i monta su te tocaa domandarghe a l’autista “Che paese elo?”

Te ghe domandai ‘ndove i va…
Mi no volea far el biglietario se no ghe sarea sta par sempre. (Invece ha cambiato lavoro Ndr.)

Ghera un vecioto insieme e mi e ’ndavimo dacordo; l’era brao da motori .

I ne portaa i motori, i desfaimo e i lavaimo, meteimo a posto e faseimo tutto quel che ghera da far, meteimo in moto sul cavaleto e ghe i daseimo da montar.

Domanda: Mi stupiscono tutti queste corriere per Bosco. Così tante?

La strada l’arivavaa ai Trachi, lì ghera el salto che i rivaa coi sii e i 'ndava a siar.

Marisa: Me papà andava a siar con gli sii de legno, fati a man dal vecio Rupiani. No gh’era schilif a quel tempo …

Sante: I siava ‘ndo capitaa. S. Giorgio nol ghera gnanca.

Ho fato un inverno intero su a San Roco dala parte de là. I te mandaa là parchè de giorno ferial l’autista el se fasea anca i biglieti, parchè ghera poca gente.
Al luni ghe ocorea el biglietario parchè a Negrar ghera el marcà .
Ala festa dormea sulà.
Al luni te vegnei zo, te fasei i conti dei biglieti e dei schei;  te, te metei la tuta e te 'ndavi in oficina. ….. Se ale ondese e mesa i metea fora l’ordine del giorno che sul lago o a Legnago ghera el biglietario malà te tocaa cambiarte e nar.

So vegnuo via parchè no podea vedarme, no podea vedarme! (a fare il bigliettaio Ndr.)

Alfonso el laoraa par conto suo al Beneli, rapresentante, el savea che mi laoraa in oficina, che gavea i motorini da metar a posto, tute le sere, (i era i primi motorini) e gò dito: “ Senti ti te ghè laoro, mi ghè no anca mi, parchè no verzemo oficina mi e ti?”

L’ò convinto e avemo verto quel portego che ghera da Bertani (a Marzana Via Valpantena Ndr.) 'ndo ghè adesso la casa de la scola guida. Ghera un volto come quel che va rento da Anichini. Stesso. Ghera un portego che vedea verso montagna. 'Na olta i garà avu i cavai e la carossa!

 

Dopo ... emo ciapà quatro palanche ... en fato un po de debito ... ghera quel toco de teren in vendita. I era domila metri ma no podeimo mia torlo tuto e alora l’ha comprà Belamoli i mile metri de difarensa. Mile lù, mile noantri.
Pian pianin emo fato su un casoto, ghemo zontà, po’ emo fato quel che emo fato .…

Enzo  e Luigi a Marzana, nel cortile dell'officina di Sante e Alfonso
Foto di Sante Slemer anni '70 circa

Le biciclete: Le prime che giustaa i era da Camera, ne la prima cortesina su par Borgo Venessia.

So pupà el gavea un laoro… ! So fradel l’era rento a Porta vescovo. Adesso no 'l ghe più. Uno l’era l'Abele, quel de Borgo Venessia.

Le biciclete i era tute marchè Camera. Ghera un butel che alora el le fasea lu i telari.

Adesso i telari i è tuti de  fabriche grosse, i fa sinquanta telari e i ghe mete su le so marche.

Adesso ghe n' è pochi che sa far la biciclete.

Quando uno el vegnea a comprar la bicicleta el vecio Camera el ghe disea: “Senti che peso!”

Adesso i ghe dise: “Senti che legera!”

Alora ghera: la normale, meso balonsin e la bicicleta a balon col coperton piassè grosso. Meso balonsin l'era in frameso. Tuti i freni i era a bacheta.
El cambio l’era ancora dei primi, che i molaa la cadena, i giraa indrio i pedai, dopo i le tiraa, tuta 'na roba cosita.